Një mbrëmje me Ilir Ikonomin

Publicisti dhe studiuesi i mirënjohur Ilir Ikonomi vjen në Toronto me ftesë të ACDA për të prezantuar studimin e tij më të fundit botuar me titull "Fan Noli - Apostulli". Ky studim është pritur me interes të veçantë nga lexuesit jo vetëm se sjell dokumente të reja mbi figurën shumëpërmasore të Fan Nolit, por edhe për paraqitjen me realizëm të saj.  Ja disa nga vlerësimet që i janë bërë këtij studimi

-

Ndryshe  nga shumë biografë të Fan Nolit, Z. Ikonomi di ku ta vendosë  kufirin; ai di të mbajë distancë dhe të mos nxitohet në opinione. Qasja e tij e ekuilibruar e dallon nga të tjerët. 

Prof. Bernd Fischer

-

Ky vëllim i parë trajton jetën, përpjekjet e Nolit të ri në vitet 1906-1920, pra nga ardhja në Amerikë deri tek nisja e dytë për në atdhe në korrik 1920. Përmes digresionesh autori tregon edhe shumë momente të rëndësishme të jetës së Nolit duke pasur si busull synimin për ta bërë sa më të kapshëm karakterin e Nolit si veprimtar guximmadh dhe i përkushtuar ndaj çështjes kombëtare shqiptare, natyrisht pa e himnizuar, por duke mbajtur qendrim objektiv, jo rrallë edhe kritik ndaj vetë heroit.

Thanas Gjika

-

Njëri nga aspektet më të rëndësishme sipas të cilit vlerësohet një biografi si gjini e shkrimit është aftësia e autorit të rikrijojë botën kur dhe ku subjekti ka jetuar dhe si ka funksionuar ai brenda saj. Në këtë standard, pa asnjë dyshim, Ikonomi e kalon provimin me notë dhjetë. 

Uk Lushi